गाउँ, वनपाखाका घुम्ती हुँदै बन्दीपुर बजार आइपुग्यौ । मोटरबाट झट्ट ओर्लिदा भक्तपुरको कुनै टोलमा पुगेको भान हुदोरहेछ । सडकको दायाँबायाँ टम्म मिलेका घरहरु छन् । दक्षिण मोहडाका घरहरुमा तलतिर दलान त्यसकोमाथि घाम ताप्ने बार्दली र फूलका गमलाहरु लहरै देखिन्छन् । उत्तर मोहडाका घरहरुमा पसलका लहरहरु छन् । ढुङगाले छापेको सडक र स्लेटले छाएको घरका दुइपाखे छानोले विशेष चित्रकारी रंग दिएको छ बन्दिपुर शहरलाई । काठका कलात्मक झ्यालहरुले नेवार शहरको वास्तुकलालाई सहजै झल्काउँछ ।